- Advertisement -

ბათუმის საზღვაო პორტში მოშიმშილეების მოსანახულებლად აჭარის ჯანდაცვის მინისტრი მივიდა

ზაალ მიქელაძე პორტში დასაქმებულების ჯანმრთელობის მდგომარეობით დაინტერესდა. მინისტრი ამ წუთებში გაფიცულ თანამშრომლებს ესაუბრება და მოუწოდებს საკუთარ ჯანმრთელობას გაუფრთხილდნენ, მითუმეტეს რომ ხელმძღვანელობამ რეორგანიზაციის პროცესი შეაჩერა.

გაფიცულები აცხადებენ, რომ პროტესტს არ შეწყვეტენ მანამ სანამ ბათუმის საზღვაო პორტის დირექტორი დანიარ მუხამედ-რახიმი თანამდებობას არ დატოვებს.

პორტის თანამშრომლები უკვე მესამე დღეა ადმინისტრაციული შენობის მისაღებში აქციას მართავენ, რამდენიმე მათგანი დირექტორის გადადგომის მოთხოვნით შიმშილობს. ისინი აცხადებდნენ, რომ მიმდინარე წელს 26 თანამშრომელი გაათავისუფლეს, რეორგანიზაციის ფარგლებში კი კიდევ ბევრ ადამიანს ემუქრებოდა სამსახურის დაკარგვა. გუშინ პორტის დირექტორმა მედიასთან განაცხადა, რომ რეორგანიზაციას პორტი აღარ განახორციელებს, თუმცა თანამშრომლები მისი გადადგომის მოთხოვნით აქციას მაინც განაგრძობენ.

დირექტორთან შესახვედრად ავიდა მინისტრიც და აქციის ერთ-ერთი ორგანიზატორიც.

აქციის მონაწილეები გუშინ დაწყებული გამოძიების შეწყვეტასაც ითხოვენ. შინაგან საქმეთა სამინისტრომ გუშინ საღამოს პორტის ადმინისტრაციის ინფორმაციის საფუძველზე, რაც პორტის თანამშრომლების მიერ გემის სპეციალურ ჩახერგვას უკავშირდებოდა, საქმე აღძრა სს კოდექსის 222-ე პრიმა მუხლის პირველი ნაწულით, რაც სატრანსპორტო საშუალების ბლოკირებას გულისხმობს. გაფიცულები ამბობენ, რომ სამართლწბრივი დევნა 11 ადამიანს შეეხო.

Comments
Loading...