- Advertisement -

ბათუმში, ევროპის მოედანზე, სოფლის ტურიზმის ფესტივალი “განდაგანა’ მიმდინარეობს

სოფლის პროდუქტების გამოფენა-გაყიდვა, მხიარული შეჯიბრებები, მასტერკლასები, ღვინის სახალხო დაწურვა და ფოლკლორი შოუ – ღონისძიებები ზღვისპირა ქალაქში მიმდინარეობს. 

მთიანი აჭარის ხუთივე მუნიციპალიტეტი მისთვის დამახასიათებელი პროდუქტებით, ხილით, ტკბილეულით, ხელნაკეთი ნივთებითა და ტრადიციებით ევროპის მოედანზე ორი დღის განმავლობაში იქნება წარმოდგენილი.

სოფლის ტურიზმის ფესტივალის მიზანი მთიანი აჭარის პოპულარიზაცია და წარმოჩენაა. 6-7 ოქტომბერს, ევროპის მოედანზე მისულ სტუმრებს საშუალება ექნებათ აჭარის სოფლებში ქალაქიდან გაუსვლელად იმოგზაურონ.

ფესტივალის ფარგლებში მოეწყო განდგანას ცეკვისა და კულინარიული მასტერკლასი, ჩურჩხელის ამოვლება, ჭაჭის გამოხდა, სოფლის ბოულინგი გოგრებით, შეშის დაჩეხვა, სინორისა და ბორანოს მომზადება. კონკურსის გამარჯვებულები ნატურალური პროდუქტებით დაჯილდოვდებიან.

"ფესტივალი წელს მესამედ იმართება და მაშტაბები გაზრდილია, მოსახლეობის ინტერესებიდან გამომდინარე. ფესტივალის მიზანია სოფლის ტურიზმის განვითარება და ადგილზე დამზადებული პროდუქტების პოპულარიზაცია" – განუცხადა "აიპრესს" ტურისტული პროდუქტების განვითარების სააგენტოს დირექტორმა თინათინ ზოიძემ.

Comments
Loading...