- Advertisement -

“გურჯაანი – მეღვინეობის ქალაქი” – მერიაში ტურიზმის განვითარების ახალ სტრატეგიაზე მუშაობენ

"გურჯაანი – მეღვინეობის ქალაქი – ეს არის ჩვენი დევიზი და მთავარი ამოცანა. გვინდა, გურჯაანი ტურისტებისთვის ღვინოსთან და იმ ტრადიციებთან ასოცირდებოდეს, რაც ღვინის და ვაზის კულტურასთან არის კავშირში".- განაცხადა "აიპრესთან" საუბრისას ნინო ნინოშვილმა, რომელიც გურჯაანის მუნიციპალიტეტის მერიის საგარეო ურთიერთობების, საერთაშორისო პროექტების და ტურიზმის განვითარების ახლადშექმნილ განყოფილებას ხელმძღვანელობს. 

მისი თქმით, მუნიციპალიტეტში ტურიზმის განვითარების სტრატეგიის შემუშავებაზე აქტიური მუშაობა მიმდინარეობს.

„მოვიწვიეთ გერმანელი ექსპერტი, რომელიც ხუთ მაისს ჩამოვა. ის ჩვენთან ჯერჯერობით სამი კვირის განმავლობაში ითანამშრომლებს.

შევეცდებით შევისწავლოთ ყველა ის პრობლემა, რაც ამჟამად რაიონში ამ კუთხით არსებობს. დიდი ყურადღება მიექცევა ქალაქს იმიტომ, რომ არის ძალიან დიდი პოტენციალი ახტალის სახით. ერთი კვირის წინ გვყავდა სტუმრად გერმანელი მუსიკოსები. მომავალში მათთან ერთად იგეგმება ახალი პროექტები. გვინდა მუსიკალური სკოლის ბავშვები წავიყვანოთ მიუნხენში, სადაც კონცერტებში მიიღებენ მონაწილეობას.

სტუმრებმა გამოთქვეს სურვილი დაგვაკავშირონ გერმანიაში ტურისტულ ორგანიზაციებთან. მათი მეშვეობით გერმანიიდან გურჯაანში პირდაპირ მოხდება ტურისტების ჩამოყვანა. აი მაგალითად, როგორც სიღნაღს იცნობენ სიყვარულის ქალაქად, გვინდა, გურჯაანი აღიქმებოდეს ღვინის ქალაქად.ამისთვის გვაქვს მარნების პროექტი, ამ კუთხით რაიონში დიდი პოტენციალია. ძირითადად, ამაზე ვიქნებით ფოკუსირებული. თითოეული გურჯაანელის აზრი ჩვენთვის მნიშვნელოვანია, თუ რას შეცვლიდნენ და გააკეთებდნენ ქალაქის აღორძინებისთვის.“- განაცხადა ,,ააპრესთან,, საუბრისას ნინოშვილმა.

გურჯაანის მერიის ახლადშექმნილ სამსახურში სამომავლოდ მასშტაბური რთვლის და ღვინის ფესტივალის ჩატარებასაც გეგმავენ.

Comments
Loading...