- Advertisement -

თელავის საკრებულოს სხდომაზე “ოცნებისა” და “ევროპული საქართველოს” დეპუტატები ერთმანეთს დაუპირისპირდნენ

"ქართული ოცნებისა" და "ევროპული საქართველოს" დეპუტატებს შორის სიტყვიერი შელაპარაკება მოჰყვა სოფელ რუისპირის შიდასაუბნო გზების მოასფალტების თანხის გადამისამართებას სოფლებში – კისისხევსა და ვარდისუბანში, სადაც სტადიონების კეთილმოწყობა იგეგმება.

"ევროპული საქართველოს" წარმომადგენებმა სოფლისთვის განსაზღვრული თანხის გადამისამართება პოლიტიკურ ანგარიშსწორებად შეაფასეს.

"იმის გამო, რომ აღნიშნულ სოფელში არჩევნებში "ქართულმა ოცნებამ" ვერ გაიმარჯვა, სოფელი ისჯება. მოსახლეობას არ აქვს სასმელი წყალი,თუ გზისთვის ეს თანხები არასაკმარისია, იქნებ წყლის სისტემის მოსაგვარებლად გამოგვეყენებინა, სხვა სოფელზე რატომ მიმართეს თანხა, რომელის გამოყენება სხვა მიმართულებით შეგვეძლო?!“- განაცხადა საკრებულოს სხდომაზე რუისპირის მაჟორიტარმა დეპუტატმა მოძრაობა "ევროპული საქართველოდან", ზურაბ ნაცარაშვილმა. 

"ევროპული საქართველოს" თელავის ორგანიზაციის თავმჯდომარე ლეილა მენთეშაშვილმა მმართველი პარტია მათი პარტიის წევრების დისკრიმინაციაში დაადანაშაულა. ოპონენტების ბრალდებებს საკრებულოს წევრმა ლევან კოჭლოშვილმა პიარზე გათვლილი დემაგოგია უწოდა. თელავის საკრებულომ საკითხი კენჭისყრაზე ხმათა უმრავლესობით დაამტკიცა.

Comments
Loading...