- Advertisement -

თელავში, პოლიციის თანამშრომლებმა დაუმორჩილებლობისა და შეურაცხყოფისთვის ერთი პირი დააკავეს

თელავში, საპატრულო პოლიციის თანამშრომლებმა დაუმორჩილებლობისა და შეურაცხყოფისთვის გურჯაანის მკვიდრი 25 წლის გ.ქ. ადმინისტრაციული წესით დააკავეს. 

დაკავების ვიდეო თვითმხილველმა გაავრცელა. ვიდეომასალაში ისმის, როგორ მიმართავს დაკავებული სამართალდამცველებს შემდეგი სიტყვებით – "გავიგუდე, ყელში ნუ მიჭერ“. 

შინაგან საქმეთა სამინისტროს ინფორმაციით, მამაკაცმა პოლიციას წინააღმდეგობა გაუწია და კანონიერ მოთხოვნას არ დაემორჩილა.

-"პატრულმა გამოიყენა პროპორციული ძალა აღნიშნული წინააღმდეგობის დასაძლევად, რისი უფლებაც მას კანონით აქვს მინიჭებული. პოლიცია მოქმედებს კანონის ფარგლებში."

გ.ქ. ადმინისტრაციულ სამართალდარღვევათა კოდექსის 173-ე მუხლით დააკავეს, რაც სამსახურებრივი მოვალეობის შესრულების დროს სამართალდამცავი ორგანოს მუშაკის, სამხედრო მოსამსახურის, სახელმწიფო დაცვის სპეციალური სამსახურის თანამშრომლის ან აღსრულების პოლიციელის კანონიერი განკარგულებისადმი ან მოთხოვნისადმი ბოროტად დაუმორჩილებლობას გულისხმობს.

საქმეს თელავის რაიონული სასამართლო დღეს განიხილავს.
 

Comments
Loading...