- Advertisement -

მარნეულში ქართული ღვინის კვირეული გაიხსნა

დღეს, მარნეულის მუნიციპალიტეტის ადგილობრივი თვითმმართველობის ორგანიზებით და საქართველოს სოფლის მეურნეობის სამინისტროს მხარდაჭერით, მარნეულში გაიხსნა ღვინის კვირეული სახელწოდებით – „მარნეული- ვაზის აკვანი“, სადაც მოსულ სტუმრებს ქართული ღვინის მწარმოებელი მსხვილი და საშუალო კომპანიებმა, მცირე და ოჯახური მარნებმა წარმოუდგინეს საკუთარი პროდუქცია,- ამის შესახებ ინფრომაციას მარნეულის მუნიციპალიტეტის გამგეობა ავრცელებს.

ღონისძიების ფარგლებში მოეწყო ქართული ღვინის, თაფლის, ყველის და სხვა სასოფლო -სამეურნეო პროდუქტების გამოფენა-გაყიდვა.

ქართული ღვინის კვირეული მარნეულში დატვირთული იყო სხვადასხვა აქტივობებით: ღია ცის ქვეშ, ჩატარდა ლექცია – პრეზენტაცია, მარნეულის მუნიციპალიტეტის ტერიტორიაზე აღმოჩენილი მსოფლიოში უძველესი წიპწებისა და საღვინე ჭურჭლის შესახებ, რომელსაც ეროვნული მუზეუმის მეცნიერ-თანამშრომელი მინდია ჯალაბაძე უძღვებოდა. სხვადასხვა პერფორმანსთან ერთად ტრადიციულად, საზეიმოდ გაიხსნა ქვევრი, დაიწურა ყურძენი საწნახელში, მოდუღდა თათარა და ამოივლო ჩურჩხელები, ანსამბლ „ჰუჯაბის“ მიერ შეასრულებული ფერხულის სიმღერის „საწნახლური“-ს თანხლებით.

ასევე მოეწყო ხელნაკეთი ნივთების გამოფენა- გაყიდვა და გაიმართა ქართული ჭიდაობის ტურნირი.

ღვინის კვირეულის გახსნის ცერემონიალს, ცენტრალური და ადგილობრივი თვითმმართველობის ხელმძღვანელი პირები, ადგილობრივი მოსახლეობა და სხვა მოწვეული სტუმრები ესწრებოდნენ.

აღსანიშნავია, რომ ქართული ღვინის კვირეული, სოფლის მეურნეობის სამინისტროსა და ღვინის ეროვნული სააგენტოს ორგანიზებით, წელს უკვე მეოთხედ აღინიშნება და მოიცავს ქართული ღვინის პოპულარიზაციასთან დაკავშირებულ არა ერთ საინტერესო ღონისძიებას.

ღონისძიება მარნეულის შემდეგ საქართველოს სხვადასხვა რეგიონში გადაინაცვლებს.

Comments
Loading...