- Advertisement -

პანკისის ხეობის მოსახლეობა უკვე კვირაზე მეტია პრემიერის სახელზე გაგზავნილ მიმართვაზე პასუხს ელის

უხუცესთა ალტერნატიული საბჭოს წევრის, ემზარ ტოხოსაშვილის თქმით, მიმართვაში, რომელიც სახელმწიფო კანცელარიას ჩააბარეს, პანკისის ხეობაში დაგეგმილი ჰესების აშენებასთან დაკავშირებით მოსახლეობის პოზიცია და არგუმენტებია მოყვანილი. ოთხგვერდიან მიმართვაში საუბარია ჰესის აშენების შემთხვევაში რა საფრთხე შეიძლება დაემუქროს მოსახლეობის ჯანმრთელობას და ხეობის ეკოლოგიას.

“პანკისის ხეობაში უკვე გვაქვს “ხადორჰესი“ და კიდევ დამატებით აქ ჰესების აშენება ჩვენ ჯანმრთელობაზე უარყოფითად აისახება და სერიოზულ პრობლემებს ეკოლოგიასაც შექმნის, მაგის გარდა რადიაციის დონე მოიმატებს და იძულებული გავხდებით აქედან ავიბარგოთ და გადავსახლდეთ, ამ აზრისაა ხეობაში უმეტესობა და ხომ შეიძლება გაითვალისწინოს ეს მოთხოვნა“ – განაცხადა ტოხოსაშვილმა.

პანკისის ხეობაში ამბობენ, რომ 2 თებერვალს გამართული საპროტესტო აქციის შემდეგ, ჰესების აშენების მოწინაღმდეგე აქტივსტების და უხუცესების პოლიციაში დაბარების და ზეწოლის ფაქტებს ადგილი აღარ ჰქონია.

Comments
Loading...