- Advertisement -

სეს: გურჯაანის აგრარულ ბაზარში არსებულ ხორცისა და ყველის რამდენიმე განყოფილებას საწარმოო პროცესი შეუჩერა

სურსათის ეროვნული სააგენტოს ინფორმაციით, კახეთის რეგიონულმა სამსახურმა გურჯაანის აგრარულ ბაზარში არსებულ ხორცისა და ყველის რამდენიმე განყოფილებას კრიტიკული შეუსაბამობის გამო საწარმოო პროცესი შეუჩერა.

ამ ინფორმაციას სურსათის ეროვნულ სააგენტოში ადასტურებენ.

თუმცა, ყველითა და ხორცით მოვაჭრეები აცხადებენ, რომ მითითება საწარმოო პროცესის დახურვის შესახებ ჯერ არ მიუღიათ.
საწარმოო პროცესის შეჩერების ფაქტს არ ადასტურებს ბაზრის დირექტორი ლამარა აკოფაშვილი. მისი თქმით, ოქმი ამის შესახებ ჯერ არ ჩაბარებიათ.

"გასულ წელს სურსათის უვნებლობის სამსახურმა ხუთჯერ მაინც გადაგვახდევინა ჯარიმა. ახლა დღეს, წლის დასაწყისში მოვიდნენ. ვეუბნებით, რომ ამ ბაზართან დაკავშირებით სასამართლო პროცესი მიმდინარეობს, მაგრამ არ ითვალისწინებენ. 

1000 ლარიანი ჯარიმა დაუწერიათ, ხვალ ალბათ ოქმი მოვა. საწარმოო პროცესი არავის შეჩერებია. როცა წავიდნენ მაშინ დამირეკეს, დაგვავიწყდა გვეთქვა, რომ ბაზარში მდებარე სახაჭაპურეებმა შეწყვიტონ ფუნქციონირებაო. მე გადავეცი, რაც მითხრეს. რა ვიცი, ხომ გეუბნებით, ყველზე და ხორცზე არაფერი დაწერილა, მაგრამ ოქმი რომ მოვა ვნახავთ. “- განაცხადა გურჯაანის ბაზრის დირექტორმა, ლამარა აკოფაშვილმა.

Comments
Loading...