- Advertisement -

ხულოში საშტატო ნუსხასთან დაკავშირებით “ნაციონალურ მოძრაობას” შენიშვნები აქვს

ხულოში საშტატო ნუსხასთან დაკავშირებით "ნაციონალურ მოძრაობას" შენიშვნები აქვს, როგორც ოთარ შაინიძე "აიპრესთან" აცხადებს, საშტატო ნუსხა არაა ხულოზე და ხულოს მოსახლეობაზე მორგებული, მისივე თქმით ეს არის ნუსხა რომელიც კონკრეტულ პიროვნებებზე აქვთ მორგებული და იმ სოფლებში სადაც ხელისუფლებამ არჩევნები წააგო აპირებენ სოფლის წარმომადგენლების შემცირებას.

"შემოიტანეს საშტატო ნუსხა, მათ მიერ 2014 წელში მიღებული ის არასწორი გადაწყვეტილება, რითაც შეეცადნენ, რომ ყველა სოფელში გაეთავისუფლებინათ ის ადამიანები რომლებიც, მათ გუნდს არ წარმოადგენენ, ამიტომ მაშინ გააკეთეს რეორგანიზაცია, დანიშნეს მათი მხარდამჭერები. ეხლაც შემოაქვთ მათი ანალოგი ზუსტად იმ სოფლებში სადაც მათ არჩევნები წააგეს, ყველა დიდ სოფელზე და ყველა დიდი თემზე სადაც მათ არჩევნები წააგეს, ეს არის: დეკანაშვილები, დაბა, სხალთა, თხილვანა, უნდათ, რომ შემოიტანონ ის საშტატო ნუსხა და მოარგონ მათ მხარდამჭერებს და ის რომ არცერთი ოპოზიციური ფრთის ერთ შენიშვნასაც არ ითვალისწინებენ, თუნდაც მათ მიერ ნახსენები არცერთი, ინფრასტრუქტურული სამსახურის კუთხითაც. აკეთებენ ისეთ საშტატო ნუსხას რომელიც კონკრეტულ პიროვნებებზე აქვთ მორგებული, ფაქტიურად ეს საშტატო ნუსხა არანაირად წინსვლის არაფერი არ იქნება და არც ხულოს მოსახლეობას მოარგებს, უბრალოდ ეს არის კონკრეტულ პიროვნებებზე მორგებული", – განაცხადა "აიპრესთან" ხულოს "ერთიანი ნაციონალური მოძრაობის" ფრაქციის თავმჯდომარე ოთარ შაინიძემ.

ოპოზიციური პარტიის შენიშვნებს უსაფუძვლოს უწოდებენ მერიაში, როგორც მუნიციპალიტეტის მერიის იურიდიული განყოფილების უფროსი „აიპრესთან“ აცხადებს, ის გამოთავისუფლებული 5 საშტატო ერთეული გადანაწილებული იქნება კონკრეტული სამსახურების მიმართ, ირაკლი ხაჯიშვილის განცხადებით.

„ჩემს მიერ გატანილი პროექტი უნდა ამოქმედდეს პირველი მაისიდან, რეორგანიზაციის პროცედურებიდან გამომდინარე, აღნიშნულ საკითხთან დაკავშირებით ვერ დავეთანხმები ოპოზიციურ პარტიას რადგან მათი შენიშვნები იყო უსაფუძვლო გამომდინარე იქედან, რომ ხულოს მუნიციპალიტეტის მერს ჰყავდა 54 თანამშრომელი წარმომადგენლებისა და სპეციალისტების ჩათვლით, დღევანდელი სტრუქტურის მიხედვით 49 სპეციალისტი იქნება, 13 მერის წარმომადგენელი, ხოლო 36 სპეციალისტი იქნება წარმოდგენილი. ხოლო ის კონკრეტულად გამოთავისუფლებული 5 საშტატო ერთეული გადანაწილებული არის კონკრეტული სამსახურების მიმართულებით. 

25 წარმომადგენელი იყო აქედან დარჩა მხოლოდ 13 რაც შეეხება გამოთავისუფლებულ ადგილებს აღნიშნულ ადამიანებს მობილობის წესით შეთავაზებული ექნებათ სხვა ტოლფას თანამდებობებზე გადასვლა ან იმ შემთხვევაში თუ შესაბამისი პოზიციები ვერ იქნება მოძიებული იქნებიან ჩარიცხული რეზერვში, საჯარო სამსახურის კანონის შესაბამისად", – განაცხადა "აიპრესთან" ხულოს მუნიციპალიტეტის მერიის იურიდიული განყოფილების უფროსმა ირაკლი ხაჯიშვილმა. 

საკითხი საკრებულოს სხდომაზე უკვე დამტკიცდა.

Comments
Loading...