შავშეთის ქუჩაზე, ავტოსადგურის მიმდებარედ არსებულ ევკალიპტის ხესთან დაკავშირებით გვინდა განვმარტოთ, რომ აღნიშნული ხე-მცენარე მრავალწლიანია, გადაზრდილია და მისი ამჟამინდელი მდგომარეობა სახიფათოა, ასევე აღენიშნება გადახრა. კვლევის შედეგად დადგინდა, რომ ფესვთა სისტემა დაზიანებულია და აქვს ე.წ. მშრალი სიდამპლე. ხე იქნა გადაბელილი, ნებართვა კი გაიცა გამწვანების სამსახურის მიერ.
როგორც მოგეხსენებათ კეთილმოწყობის სამმართველო ამავე ქუჩაზე ახორციელებს სარეაბილიტაციო სამუშაოებს. პროექტის ერთ-ერთი მნიშვნელოვანი ხაზი ახალი სანიაღვრე კოლექტორის მშენებლობაა.
ამჟამინდელი მდგომარეობით, ევკალიპტის ხე ძველი სანიაღვრე კოლექტორის გამტარუნარიანობას ზღუდავს 30-40%-ით. ამავე ხაზზე უნდა განხორციელდეს ახალი სანიაღვრე კოლექტორის მშენებლობაც, ხოლო ხის ფესვთა სისტემა მნიშვნელოვნად უშლის ხელს სამუშაოების ჩატარებას.
ახალი კოლექტორი მნიშვნელოვანია როგორც შავშეთის ქუჩის სანიაღვრე წყლებისთვის ასევე ბონი-გოროდოკისა და დარჩენილი ე.წ. ჭაობის ქუჩების სანიაღვრე სისტემისათვის.
შესაბამისი გარემოებებიდან გამომდინარე, კონტრაქტორმა კომპანიამ წერილობით მიმართა კეთილმოწყობის სამმართველოს, წერილი გაიგზავნა გამწვანების სამსახურში, მოხდა საკითხის შესწავლა დენდროლოგიური და კომისიური წესით და დადგინდა რომ ხე არის დაავადებული და გადაზრდილი.
ამ ეტაპზე იქნა მიღებული გადაწყვეტილება ხის გადაჭრასთან და შემდგომ მოჭრასთან დაკავშირებით.